ଶୋପିଆନରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ; ଜଣେ ଆତଙ୍କବାଦୀ ନିହତ, ଅପରେସନ୍ ଜାରି
ଶନିବାର ସକାଳେ ଦକ୍ଷିଣ କାଶ୍ମୀରର ଶୋପିଆନରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏକ ଏନକାଉଣ୍ଟର ହୋଇଛି। ଶୋପିଆନ୍ର ଜେନପୋରା ଅଞ୍ଚଳର ଚେରମର୍ଗରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ ହୋଇଛି। ଏହି ଗୁଳିବିନିମୟରେ ସୁରକ୍ଷା ବାହିନୀ ଦ୍ୱାରା ଜଣେ ଆତଙ୍କବାଦୀ ନିହତ ହୋଇଛି। ନିହତ ଆତଙ୍କବାଦୀଙ୍କୁ ଏପର୍ଯ୍ୟନ୍ତ ଚିହ୍ନଟ କରାଯାଇ ନାହିଁ। ସୁରକ୍ଷା ବାହିନୀର କାର୍ଯ୍ୟ ଜାରି ରହିଛି। ଏହି ଅଞ୍ଚଳରେ ଅଧିକ ଆତଙ୍କବାଦୀଙ୍କ ଉପସ୍ଥିତି ହେବାର ସମ୍ଭାବନା ରହିଛି। ଆତଙ୍କବାଦୀଙ୍କ ଉପରକୁ ଗୁଳି ଚଳାଇବା ପୂର୍ବରୁ ସୁରକ୍ଷା ବାହିନୀ ସେମାନଙ୍କୁ ଅନେକ ଥର ସୁଯୋଗ ଦେଇଥିଲେ। ଜଣେ ଆତଙ୍କବାଦୀ ନିହତ ହେବା ପରେ ମଧ୍ୟ ସୁରକ୍ଷା କର୍ମୀ ଏହି ଅଞ୍ଚଳରେ ଲୁଚି ରହିଥିବା ଅନ୍ୟ ଆତଙ୍କବାଦୀଙ୍କୁ ଆତ୍ମସମର୍ପଣ କରିବାକୁ କହୁଛନ୍ତି, କିନ୍ତୁ ବର୍ତ୍ତମାନ ଅପରେସନ ଜାରି ରହିଛି।
ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଜେନପୋରାର ଚେରମର୍ଗରେ ଆତଙ୍କବାଦୀଙ୍କୁ ଦେଖିବା ପରେ ତୁରନ୍ତ ସେଠାରେ ପହଞ୍ଚିଥିବା SOG, ଆର୍ମି ଏବଂ CRPF ର ମିଳିତ ଟିମ୍ ସର୍ଚ୍ଚ ଅପରେସନ କରିଥିଲା। ସୁରକ୍ଷା ବାହିନୀର ଟିମ୍ ସନ୍ଦିଗ୍ଧ ସ୍ଥାନକୁ ଆସିବା ପରେ ଲୁଚି ରହିଥିବା ଆତଙ୍କବାଦୀମାନେ ସେମାନଙ୍କ ଉପରକୁ ଗୁଳି ଚଳାଇଥିଲେ। ଗୁଳି ବିନିମୟରେ ଏହାର ଜବାବ ଦେଇ ସୁରକ୍ଷା ବାହିନୀ ଲୁଚି ରହିଥିବା ଆତଙ୍କବାଦୀଙ୍କୁ ଆତ୍ମସମର୍ପଣ କରିବାକୁ କହିଥିଲେ କିନ୍ତୁ ଆତଙ୍କବାଦୀମାନେ ସୁରକ୍ଷା ବାହିନୀ ଉପରେ ଗୁଳି ଚଳାଇଥିଲେ।
ଏହାପୂର୍ବରୁ ଶୁକ୍ରବାର ଦିନ ଆତଙ୍କବାଦୀମାନେ ଶ୍ରୀନଗରର ନୋହାଟା ଅଞ୍ଚଳର ଖ୍ୱାଜା ବଜାରରେ ଗ୍ରେନେଡ ଆକ୍ରମଣ କରିଥିଲେ। ଏହି ଆକ୍ରମଣରେ ଜଣେ ପୋଲିସ କର୍ମଚାରୀ ଆହତ ହୋଇଛନ୍ତି। ଆକ୍ରମଣର କିଛି ସମୟ ପରେ ପୋଲିସ ଏବଂ ସୁରକ୍ଷା ବାହିନୀ ଆକ୍ରମଣକାରୀଙ୍କ ସନ୍ଧାନରେ ମିଳିତ ଅପରେସନ୍ ଆରମ୍ଭ କରିଥିଲେ। ଏବେ ମଧ୍ୟ ଗୁଳିବିନିମୟ ଚାଲିଥିବା ଜଣାପଡିଛି।