ଇସ୍ରୋ ବୈଜ୍ଞାନିକଙ୍କୁ ସମ୍ବୋଧିତ କଲାବେଳେ ଲୁହରେ ଭରିଯାଇଥିଲା ପ୍ରଧାନମନ୍ତ୍ରୀଙ୍କ ଆଖି

ଓଡ଼ିଆ ନ୍ୟୁଜ୍ (ବ୍ୟୁରୋ): ବିଦେଶ ଗସ୍ତରୁ ଫେରିବା ପରେ ଆଜି ବେଙ୍ଗାଲୁରୁରେ ଯାଇ ଇସ୍ରୋ ବୈଜ୍ଞାନିକଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏହାସହ ଚନ୍ଦ୍ରଯାନ-୩ ପାଇଁ ସେମାନଙ୍କର ପରିଶ୍ରମ ଓ ଧୈର୍ୟ୍ୟକୁ ଶତ ପ୍ରଶଂସା କରିଥିଲେ । ଏହି ଅବସରରେ ମୋଦୀ କହିଥିଲେ ଯେ, ‘ ସେ ବ୍ରିକ୍ସ ସମ୍ମିଳନୀ ପାଇଁ ଦକ୍ଷିଣ ଆଫ୍ରିକାରେ ଥିଲେ ବି ତାଙ୍କ ମନ କିନ୍ତୁ ଭାରତରେ ଥିଲା । ଅଗଷ୍ଟ ୨୩ ତାରିଖରେ ତାଙ୍କର ପ୍ରତିଟି ମୁହୂର୍ତ୍ତକେବଳ ଚନ୍ଦ୍ରଯାନ ପାଇଁ ଚିନ୍ତିତ ଥିଲା । ଆଉ ଯେତେବେଳେ ଚନ୍ଦ୍ରଯାନ ଚନ୍ଦ୍ର ମାଟିରେ ପାଦ ଥାପିଲା ତାଙ୍କର ମନର ଅବସ୍ଥା ବର୍ଣ୍ଣନା କରିବା କଷ୍ଟକର ।

ବିଦେଶରେ ଭାରତର ଏଭଳି ସଫଳତାକୁ ସେ ଅନୁଭବ କରିଛନ୍ତି । ସମସ୍ତଙ୍କ ମୁହଁରେ ଭାରତର ପ୍ରଶଂସା ସେ ଶୁଣିଛନ୍ତି । କେତେବେଳେ ନିଜ ଦେଶକୁ ଫେରିବେ ଆଉ ଏହି ମିଶନ ପଛରେ ଥିବା ପ୍ରତିଟି ବିଜେତାଙ୍କୁ ଭେଟିବେ ସେମାନଙ୍କୁ ପ୍ରଣାମ କରିବେ ସେଇ ଚିନ୍ତାରେ ତାଙ୍କ ମନ ଘାରି ହେଉଥିଲା’ । ତେବେ ଇସ୍ରୋ ମୁଖ୍ୟାଳୟରେ ବୈଜ୍ଞାନିକଙ୍କୁ ପ୍ରଶଂସା କରିବା ସମୟରେ ସେମାନଙ୍କୁ ହାତ ଯୋଡି ପ୍ରଣାମ କରିଥିଲେ ମୋଦୀ । ଏହି ସମୟରେ ତାଙ୍କ କଣ୍ଠ ରୁଦ୍ଧ ହୋଇଯାଇଥିଲା ଏବଂ ତାଙ୍କ ଆଖି ଲୁହରେ ଭରିଯାଇଥିବାର ଦେଖିବାକୁ ମିଳିଥିଲା । ସମସ୍ତ ଇସ୍ରୋ ବୈଜ୍ଞାନିକଙ୍କୁ ବହୁତ ବହୁତ ଧନ୍ୟବାଦ୍ ଜଣାଇଛନ୍ତି ମୋଦୀ ।