ଆଦାନୀ ଗ୍ରୁପକୁ ସୁପ୍ରିମ୍କୋର୍ଟ କମିଟିର କ୍ଲିନ୍ ଚିଟ୍
ଓଡ଼ିଆ ନ୍ୟୁଜ୍(ବ୍ୟୁରୋ): ଆଦାନୀ ଗ୍ରୁପକୁ ସୁପ୍ରିମ୍କୋର୍ଟ କମିଟିର କ୍ଲିନ୍ ଚିଟ୍। ହିଣ୍ଡେନବର୍ଗ ଅଭିଯୋଗ ସହ ଜଡ଼ିତ ତଦନ୍ତରେ ଭାରତର ନିୟାମକ ବ୍ୟବସ୍ଥାର ଯାଞ୍ଚ କରୁଥିବା ସୁପ୍ରିମ୍କୋର୍ଟଙ୍କ ଦ୍ୱାରା ନିଯୁକ୍ତ ଏକ ବିଶେଷଜ୍ଞ ପ୍ୟାନେଲ୍ ଆଦାନୀ ଗ୍ରୁପ୍କୁ କ୍ଲିନ୍ ଚିଟ୍ ଦେଇଛନ୍ତି। ପ୍ୟାନେଲ କହିଛନ୍ତି ଯେ ଏହି ମାମଲାରେ ବଜାର ନିୟାମକ ସିକ୍ୟୁରିଟିଜ୍ ଆଣ୍ଡ୍ ଏକ୍ସଚେଞ୍ଜ ବୋର୍ଡ ଅଫ୍ ଇଣ୍ଡିଆ ( ସେବି )ର କୌଣସି ନିୟାମକ ବିଫଳତା ନାହିଁ। ଡୋମେନ୍ ବିଶେଷଜ୍ଞଙ୍କୁ ନେଇ ଗଠିତ ବିଶେଷଜ୍ଞ କମିଟି ମଧ୍ୟ କହିଛି ଯେ ଆଦାନୀ ଗ୍ରୁପ୍ ତରଫରୁ କୌଣସି ମୂଲ୍ୟ ହେରଫେର ହୋଇନାହିଁ ଏବଂ ଖୁଚୁରା ନିବେଶକମାନଙ୍କୁ ଆଶ୍ୱସ୍ତି ଦେବା ପାଇଁ କମ୍ପାନି ଆବଶ୍ୟକ ପଦକ୍ଷେପ ନେଇଛି।
ଗ୍ରୁପ୍ ଦ୍ୱାରା ନିଆଯାଇଥିବା ନିୟନ୍ତ୍ରଣ ପଦକ୍ଷେପ ଷ୍ଟକ୍ ଉପରେ ଆତ୍ମବିଶ୍ୱାସ ସୃଷ୍ଟି କରିବାରେ ସହାୟକ ହୋଇଛି ଏବଂ ଷ୍ଟକ୍ଗୁଡ଼ିକ ବର୍ତ୍ତମାନ ସ୍ଥିର ରହିଛି ବୋଲି ପ୍ୟାନେଲ କହିଛି। ସୁପ୍ରିମ୍କୋର୍ଟରେ ଦାଖଲ କରାଯାଇଥିବା ରିପୋର୍ଟରେ ପ୍ୟାନେଲ କମିଟି କହିଛି ଯେ, ବର୍ତ୍ତମାନ ସମୟରେ ସେବି ପକ୍ଷରୁ ଦିଆଯାଇଥିବା ସ୍ପଷ୍ଟୀକରଣକୁ ବିଚାରକୁ ନେଲେ ପ୍ରାଥମିକ ଦୃଷ୍ଟିରୁ ମୂଲ୍ୟ କାରବାର ଅଭିଯୋଗରେ ନିୟାମକ ତ୍ରୁଟି ରହିଛି ବୋଲି କମିଟି ପାଇଁ ନିଷ୍ପତ୍ତି ନେବା ସମ୍ଭବ ହେବ ନାହିଁ। ସେବି ଦ୍ୱାରା ଗ୍ରହଣ କରାଯାଇଥିବା ଆଇନଗତ ଆଭିମୁଖ୍ୟ ସହିତ ସୁସଙ୍ଗତ ଏବଂ ଏକ ପ୍ରଭାବଶାଳୀ ପ୍ରବର୍ତ୍ତନ ନୀତିର ଆବଶ୍ୟକତା ରହିଛି ବୋଲି ଏଥିରେ କୁହାଯାଇଛି।
ଉଲ୍ଲେଖଯୋଗ୍ୟ, ଆଦାନୀ ଗ୍ରୁପ୍ ବିରୋଧରେ ହିଣ୍ଡେନବର୍ଗଙ୍କ ଅଭିଯୋଗ ଉପରେ ସେବି ଯେଉଁ ତଦନ୍ତ କରୁଛି, ତାହାର ତଦନ୍ତ ସହିତ ସୁପ୍ରିମ୍କୋର୍ଟ ଅନ୍ୟ ଏକ ଡୋମେନ୍ ବିଶେଷଜ୍ଞଙ୍କ କମିଟି ନିଯୁକ୍ତ କରିଥିଲେ। ନିକଟରେ ସୁପ୍ରିମ୍କୋର୍ଟରେ ରିପୋର୍ଟ ଦାଖଲ କରିଥିବା କମିଟି କହିଛି ଯେ ସେବି ଜାଣିବାକୁ ପାଇଛି ଯେ ହିଣ୍ଡେନବର୍ଗ ରିପୋର୍ଟ ପୂର୍ବରୁ କିଛି ସଂସ୍ଥା ଏକ କ୍ଷୁଦ୍ର ଆଭିମୁଖ୍ୟ ଗ୍ରହଣ କରିଥିଲେ ଏବଂ ରିପୋର୍ଟ ପରେ ମୂଲ୍ୟ ହ୍ରାସ ପାଇବା ପରେ ସେମାନେ ଲାଭବାନ ହୋଇଥିଲେ। ସୁପ୍ରିମ୍କୋର୍ଟଙ୍କ ଦ୍ୱାରା ନିଯୁକ୍ତ ଏହି ପ୍ୟାନେଲରେ ରହିଥିଲେ ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ଏଏମ୍ ସପ୍ରେ, ବମ୍ବେ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ଜେପି ଦେଓଧର, ଭାରତୀୟ ଷ୍ଟେଟ୍ ବ୍ୟାଙ୍କର ପୂର୍ବତନ ଅଧ୍ୟକ୍ଷ ଓପି ଭଟ୍ଟ, ଆଇସିଆଇସିଆଇ ବ୍ୟାଙ୍କର ପୂର୍ବତନ ମୁଖ୍ୟ କେଭି କାମାଥ, ଇନଫୋସିସ୍ର ସହ ପ୍ରତିଷ୍ଠାତା ନନ୍ଦନ ନିଲେକାନି ଏବଂ ସିକ୍ୟୁରିଟିଜ୍ ଓ ନିୟାମକ ବିଶେଷଜ୍ଞ ସୋମଶେଖର ସୁନ୍ଦରେସନ ରହିଥିଲ।