ପୁଣି ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତିଲା ମାଲବାହୀ ଟ୍ରେନ୍: ଟିଟିଲାଗଡ଼ରେ ୮ଟି ବଗିକୁ ଛାଡ଼ି ପଳାଇଲା ଇଞ୍ଜିନ୍
ଓଡ଼ିଆ ନ୍ୟୁଜ୍(ବ୍ୟୁରୋ): ପୁଣି ପୂର୍ବତଟ ରେଳପଥର ସମ୍ବଲପୁର ଡିଭିଜନ୍ରେ ଅଭାବନୀୟ ଘଟଣା ଘଟିଛି। ବୁଧବାର ଅପରାହ୍ଣ ସାଢ଼େ ୪ଟାରେ ଟିଟିଲାଗଡ଼-ସମ୍ବଲପୁର ରେଳଲାଇନ୍ର ଗୁଂଜିତରା ନିକଟରେ ଏଭଳି ପରିସ୍ଥିତି ଦେଖାଯାଇଛି। ଭୁବନେଶ୍ବରରୁ ଏକ ମାଲବାହୀ ଟ୍ରେନ୍ (କୋଇଲା ବୋଝେଇ) ଟିଟିଲାଗଡ଼ ଅଭିମୁଖେ ବାହାରି ଥିଲା। ଆଜି ଅପରାହ୍ଣ ପ୍ରାୟ ସାଢ଼େ ୪ଟାରେ କୋଇଲା ବୋଝେଇ ମାଲ ବାହୀ ଟ୍ରେନର ୮ ଟି ବଗି ଷ୍ଟେସନ ପୂର୍ବରୁ ଗୁଞ୍ଚିତରା ଫାଟକ ନିକଟରେ ଛିଣ୍ଡି ଅଲଗା ହୋଇଯାଇଥିଲା। ବଗି ଅଲଗା ହୋଇ ବିପରୀତ ଦିଗରେ ପଛକୁ ଫେରିଥିବା ବେଳେ ଇଞ୍ଜିନ ସହ ସଂଯୁକ୍ତ ଅନ୍ୟ ବଗି ଷ୍ଟେସନ ଅଭିମୁଖେ ଆଗକୁ ପକେଇଥିଲା।
ତେବେ ଫାଟକରେ ଥିବା କର୍ମଚାରୀ ଷ୍ଟେସନ ମାଷ୍ଟରଙ୍କୁ ଫୋନ ଯୋଗେ ଜଣାଇବା ପରେ ବିଭାଗୀୟ ତତ୍ପରତା ଦେଖାଦେଇ ଥିଲା। ତେବେ ଏଥିଯୋଗୁଁ ଏହି ଫାଟକଟି ୨ ଘଣ୍ଟାରୁ ଊର୍ଦ୍ଧ ସମୟଧରି ବନ୍ଦ ରହିଥିଲା।ତେବେ ଏହି ଅଭାବନୀୟ ପରିସ୍ଥିତି ଯୋଗୁଁ ସୌଭାଗ୍ୟ ବଶତଃ ବଡ଼ଧରଣର ଅଘଟଣ ଘଟିନାହିଁ। ମାଲବାହୀ ଟ୍ରେନ୍ଟି ବଗିଗୁଡ଼ିକ ଛାଡ଼ି ଆଗକୁ ଗଡ଼ିବାର ୧ ଘଣ୍ଟା ମଧ୍ୟରେ ଯଦି କୌଣସି ଯାତ୍ରୀବାହୀ ଟ୍ରେନ୍ ଆସିଥାନ୍ତା, ତା’ହେଲେ ଦୁର୍ଘଟଣା ଘଟିଥାନ୍ତା। କିନ୍ତୁ ଘଟଣା ସମୟରେ ଏହି ଟ୍ରେନ୍ ଲାଇନ୍ରେ କୌଣସି ଯାତ୍ରୀବାହୀ ଟ୍ରେନ୍ ଚଳାଚଳ କରି ନଥିବାରୁ ଅଘଟଣ ଘଟିନାହିଁ।