ହରିୟାଣା ସ୍କୁଲ ଦୁର୍ଘଟଣାର ଜଣାପଡିଲା କାରଣ, ପ୍ରିନ୍ସିପାଲ ସମେତ ୩ ଗିରଫ
ଓଡ଼ିଆ ନ୍ୟୁଜ,(ବ୍ୟୁରୋ): ହରିୟାଣାର ମହେନ୍ଦ୍ରଗଡ଼ରେ ଗୁରୁବାର ସକାଳେ ଏକ ସ୍କୁଲ୍ ବସ୍ ଗଛରେ ପିଟି ହୋଇ ଓଲଟି ପଡ଼ିବାରୁ ୬ ଜଣ ପିଲାଙ୍କର ମୃତ୍ୟୁ ଘଟିଥିବା ବେଳେ ୨୦ରୁ ଅଧିକ ଆହତ ହୋଇଛନ୍ତି। । ଦୁର୍ଘଟଣାସ୍ଥଳରୁ ହିଁ ଡ୍ରାଇଭରକୁ ପୋଲିସ ଗିରଫ କରିଥିଲା । ତା’ର ମେଡିକାଲ ଟେଷ୍ଟ କରାଯିବାରୁ ସେ ନିଶାସକ୍ତ ଥିବା ଜଣାପଡିଥିଲା । ବସରେ ୪୦ରୁ ଅଧିକ ଛାତ୍ରଛାତ୍ରୀ ଥିବାବେଳେ ଡ୍ରାଇଭର ଜଣକ ପ୍ରଚୁର ମଦ ପିଇ ନିଶାସକ୍ତ ଅବସ୍ଥାରେ ଗାଡି ଚଲାଉଥିଲା ।
ଚତୁର୍ଥରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ନେଇ ଯାଉଥିବା ଏହି ବସ୍ଟି ଜିଏଲ୍ ପବ୍ଲିକ୍ ସ୍କୁଲ୍ର ଥିଲା, ଯାହା ଇଦ୍-ଉଲ୍-ଫିତର ପାଇଁ ଛୁଟି ଥିବା ସତ୍ତ୍ୱେ ଚାଲୁଥିଲା। ଯେଉଁଦିନ ପିଲାମାନେ ଇଦ୍ ପର୍ବ ପାଇଁ ଘରେ ରହିବା କଥା ସେହି ଦିନ ଏକ ଅକଥନୀୟ ଦୁଃଖଦ ଘଟଣାର ଶିକାର ହୋଇଛନ୍ତି। ମଦ ପିଇ ଡ୍ରାଇଭିଂ କରିବା ଅଭିଯୋଗର ତଦନ୍ତ ଚାଲିଛି ଏବଂ ଡ୍ରାଇଭରଙ୍କ ଡାକ୍ତରୀ ପରୀକ୍ଷା କରାଯାଇଛି। ବସ୍ର ଫିଟନେସ୍ ସାର୍ଟିଫିକେଟ୍ ନବୀକରଣ କରାଯାଇ ନାହିଁ ବୋଲି ବରିଷ୍ଠ ପୁଲିସ ଅଧିକାରୀ ଅର୍ଶ ବର୍ମା କହିଛନ୍ତି। ସରକାରୀ କାଗଜପତ୍ରରୁ ଜଣାପଡ଼ଛି ଯେ ୬ ବର୍ଷ ତଳେ ୨୦୧୮ରେ ବସ୍ର ଫିଟନେସ୍ ସାର୍ଟିଫିକେଟ୍ର ଅବଧି ଶେଷ ହୋଇଥିଲା।
ଧର୍ମେନ୍ଦର ନାମକ ସେହି ଡ୍ରାଇଭର ମଦ ପିଇ ବସ୍ ଚଳାଉଥିବା ଦେଖି ସ୍ଥାନୀୟ ଗାଁ ଲୋକେ ତାକୁ ଅଟକାଇ ଥିଲେ । ତା’ ଠାରୁ ଗାଡି ଚାବି ମଧ୍ୟ ଛଡାଇ ନେଇଥିଲେ । ହେଲେ ସ୍କୁଲ କର୍ତ୍ତୃପକ୍ଷ ଫୋନ କରି ଗାଁ ଲୋକଙ୍କୁ ବୁଝାଇଥିଲେ । ସେହି ଡ୍ରାଇଭରକୁ ଚାକିରିରୁ ବାହାର କରି ଆଉ ଗୋଟିଏ ନୂଆ ଡ୍ରାଇଭର ନିଯୁକ୍ତ କରିବେ ବୋଲି ସ୍କୁଲ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିଲେ ଏବଂ ଗାଁ ଲୋକଙ୍କୁ ଚାବି ଫେରାଇବାକୁ କହିଥିଲେ । ଏ କଥା ଶୁଣି ଗାଁ ଲୋକ ମଧ୍ୟ ଚାବି ଫେରାଇ ଦେଇଥିଲେ ।