ଆଦିବାସୀ ସଂସ୍କୃତି ଓ ଜୀବନଶୈଳୀର ଅବଦାନ ଉପରେ ଜାତୀୟ ଆଲୋଚନାଚକ୍ର

ଓଡ଼ିଆ ନ୍ୟୁଜ,(ବ୍ୟୁରୋ): ଭାରତର ସଂସ୍କୃତି ଓ ଜୀବନଶୈଳୀକୁ ସମୃଦ୍ଧ କରିବାରେ ଆଦିବାସୀ ସଂସ୍କୃତି ଓ ଜୀବନଶୈଳୀର ଅବଦାନ ଉପରେ ଜାତୀୟ ଆଲୋଚନାଚକ୍ର ଓଡ଼ିଶା କେନ୍ଦ୍ରୀୟ ବିଶ୍ବବିଦ୍ୟାଳୟରେ ଉଦ୍ ଘାଟିତ | ଭାରତର ସଂସ୍କୃତି ଓ ଜୀବନଶୈଳୀକୁ ସମୃଦ୍ଧ କରିବାରେ ଆଦିବାସୀ ସଂସ୍କୃତି ଓ ଜୀବନଶୈଳୀର ଅବଦାନ ଉପରେ ଦୁଇ ଦିନିଆ ଜାତୀୟ ସେମିନାର ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପରିସରରେ ଉଦ୍ ଘାଟିତ ହୋଇଯାଇଛି। ନୂଆଦିଲ୍ଲୀସ୍ଥିତ ଆଦିବାସୀ ଜ୍ଞାନ ଗବେଷଣା କେନ୍ଦ୍ର (ଟିକେଆରସି) ଓ ଓଡ଼ିଶାର ବନବାସୀ କଲ୍ୟାଣ ଆଶ୍ରମର ମିଳିତ ସହଯୋଗରେ ବିଶ୍ୱବିଦ୍ୟାଳୟ ପକ୍ଷରୁ ଏହି ସେମିନାର ଆୟୋଜନ କରାଯାଉଛି। ଏହି ଦୁଇ ଦିନିଆ ସେମିନାରକୁ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ମାନ୍ୟବର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଆନୁଷ୍ଠାନିକ ଭାବେ ଉଦ୍ ଘାଟନ କରିଥିଲେ।

ଏହି ଅବସରରେ ଟ୍ରାଇଫେଡ୍ ର ଉପାଧ୍ୟକ୍ଷ ପବିତ୍ର କହଁର ମୁଖ୍ୟ ଅତିଥି ଏବଂ ଟିକେଆରସିର କାର୍ଯ୍ୟନିର୍ବାହୀ ବୋର୍ଡ ସଦସ୍ୟ ଡ. ବିନୋଦ କୁମାର ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଅଖିଳ ଭାରତୀୟ ବନବାସୀ କଲ୍ୟାଣ ଆଶ୍ରମର ବରିଷ୍ଠ ସଦସ୍ୟ ଗିରିଶ କୁବେର, ଆଦିବାସୀ ଅଧିକାର କର୍ମୀ ଶ୍ୟାମ ପ୍ରସାଦ ଓ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ଆସୋସିଏଟ୍ ପ୍ରଫେସର ତଥା ସେମିନାରର ଆୟୋଜକ ଡ. କପିଳା ଖେମୁଣ୍ଡୁ ପ୍ରମୁଖ ଉପସ୍ଥିତ ଥିଲେ ବୋଲି ବିଶ୍ଵବିଦ୍ୟାଳୟର ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଜଣାଇଛନ୍ତି । ସେମିନାରକୁ ଉଦ୍ ଘାଟନ କରି ପ୍ରଫେସର ତ୍ରିପାଠୀ କହିଲେ ଯେ, ଆଦିବାସୀଙ୍କ ଜୀବନଶୈଳୀ ଅନନ୍ୟ ଏବଂ ଏହାକୁ ସମସ୍ତ ଲୋକ ଅନୁସରଣ କରିବା ଉଚିତ।

ଆଦିବାସୀମାନଙ୍କର ଖୁସିର ସ୍ତର ଆଶ୍ଚର୍ଯ୍ୟଜନକ ଏବଂ ସେମାନେ କେବେ ବି ଭୌତିକ ଆବଶ୍ୟକତା ପାଇଁ ଲାଳାୟିତ ହୁଅନ୍ତି ନାହିଁ । ସେମାନେ ନିଜ ଜୀବନରେ ଯାହା ବି ରୋଜଗାର କରନ୍ତି ସେଥିରେ ଖୁସି ଥାଆନ୍ତି । ଆମେ ଶିକ୍ଷିତ, କିନ୍ତୁ ପାଶ୍ଚାତ୍ୟ ସଂସ୍କୃତିକୁ ଅନୁସରଣ କରି ଆମେ ଆମ ସଂସ୍କୃତିକୁ ଭୁଲି ଯାଇଛୁ । ତେଣୁ ଆମେ ଯଦି ଏହି ଦୁନିଆରେ ସୁଖ ଚାହୁଁଛୁ ତେବେ ଆଦିବାସୀ ସଂସ୍କୃତିକୁ ଅନୁସରଣ କରିବା ଉଚିତ୍ । ଛାତ୍ରଛାତ୍ରୀଙ୍କୁ ଅତି କମ୍ ରେ କୌଣସି ଦିନ ୧୦ ଘଣ୍ଟା ଆଦିବାସୀଙ୍କ ସହ ରହିବାକୁ ନେବାକୁ ସେ ସମସ୍ତ ଅଧ୍ୟାପକଙ୍କୁ ଅନୁରୋଧ କରିଥିଲେ। ବିଶ୍ୱବିଦ୍ୟାଳୟର ଉଦ୍ଦେଶ୍ୟ ହେଉଛି ଏହି ଅଞ୍ଚଳର ଆଦିବାସୀ ସାଂସ୍କୃତିକ ସମ୍ପଦକୁ ସଂରକ୍ଷିତ ରଖିବା । ବିଶ୍ୱବିଦ୍ୟାଳୟ ଏହାର ଉଦ୍ଦେଶ୍ୟ ପୂରଣ ପାଇଁ କାର୍ଯ୍ୟ କରିବାକୁ ପ୍ରତିଶ୍ରୁତି ବଦ୍ଧ ବୋଲି ସେ କହିଥିଲେ ।

ଶ୍ରୀ କାହଁର ଆଦିବାସୀଙ୍କ ଧାରଣାକୁ ବ୍ୟାଖ୍ୟା କରିବା ସହ ଆଦିବାସୀଙ୍କ ମଧ୍ୟରେ ଥିବା ବିଭିନ୍ନ ବର୍ଗ ଓ ବଂଶ ବିଷୟରେ ମଧ୍ୟ ବୁଝାଇଥିଲେ । ଜନଜାତି ସଂସ୍କୃତିକୁ ଲୋକପ୍ରିୟ କରିବା ଏବଂ ଭବିଷ୍ୟତ ପାଇଁ ଏହାକୁ ସଂରକ୍ଷିତ ରଖିବାର ଆବଶ୍ୟକତା ମଧ୍ୟ ସେ ଅନୁଭବ କରିଥିଲେ ଯାହା ଦ୍ୱାରା ଭାରତ ବିକାଶ ହାସଲ କରିପାରିବ । ଆମେ ଆଦିବାସୀ କୌଶଳ ଶିଖିବା ଉଚିତ ଏବଂ ଏହାକୁ ଆମ ଦୈନନ୍ଦିନ ଜୀବନରେ କାର୍ଯ୍ୟକାରୀ କରିବା ଉଚିତ୍ | ଡ. ବିନୋଦ କୁମାର ଟିକେଆରସିର ଉଦ୍ଦେଶ୍ୟ ଏବଂ ଏହାର କାର୍ଯ୍ୟକଳାପ ବିଷୟରେ ବୁଝାଇଥିଲେ। ଆଦିବାସୀ ସଂସ୍କୃତି ଓ ଆଦିବାସୀ ଗବେଷଣା ପଦ୍ଧତିକୁ ପାଠ୍ୟକ୍ରମରେ ଅନ୍ତର୍ଭୁକ୍ତ କଲେ ଆଦିବାସୀ ବିକାଶ ଚିନ୍ତାଧାରାବାସ୍ତବରେ ପରିଣତ ହୋଇପାରିବ ବୋଲି ସେ କହିଥିଲେ। ସେ ଆହୁରି ମଧ୍ୟ କହିଥିଲେ ଯେ ଆଦିବାସୀ ଗବେଷଣା ପାଇଁ ପାରମ୍ପରିକ ପାଶ୍ଚାତ୍ୟ ପଦ୍ଧତି କାର୍ଯ୍ୟ କରିବ ନାହିଁ। ଆଦିବାସୀଙ୍କ ବିଷୟରେ ଜାଣିବା ପାଇଁ ଆମେ ସେମାନଙ୍କ ସହିତ ରହିବା ଉଚିତ୍ ।

ଶ୍ରୀ କୁବେର ଭାରତର ବିକାଶରେ ଆଦିବାସୀ ସଂସ୍କୃତି ଓ ଜୀବନଶୈଳୀର ଅବଦାନ ଉପରେ ଗୁରୁତ୍ୱାରୋପ କରିଥିଲେ । ଆଦିବାସୀଙ୍କ ବାସ୍ତବ ସମସ୍ୟାକୁ ଲୋକଲୋଚନକୁ ଆଣିବା ପାଇଁ ଉପଯୁକ୍ତ ଗବେଷଣାର ଆବଶ୍ୟକତା ରହିଛି ବୋଲି ସେ କହିଥିଲେ ଏବଂ ସେହି ଅନୁଯାୟୀ ଯୋଜନା କରିବାକୁ ନୀତି ନିର୍ମାତାଙ୍କୁ ଅନୁରୋଧ କରିଥିଲେ। ଡ. କପିଳା ଖେମୁଣ୍ଡୁ ସ୍ୱାଗତ ଭାଷଣ ଦେଇ ସେମିନାରର ଉଦ୍ଦେଶ୍ୟ ବିଷୟରେ ବର୍ଣ୍ଣନା କରିଥିଲେ। ଏହି ଅବସରରେ ପ୍ରଫେସର ଶିବ ରାମକ୍ରିଷ୍ଣାଙ୍କ ଦ୍ୱାରା ଲିଖିତ ପୁସ୍ତକ ‘ଦ ହେଲ୍ଥ ଅଫ୍ ହିଲ୍ସ ଇଜ୍ ଦ ୱେଲ୍ଥ ଅଫ୍ ପ୍ଲେନ୍ସ’କୁ ବିଶିଷ୍ଟ ବ୍ୟକ୍ତିମାନେ ଉନ୍ମୋଚନ କରିଥିଲେ। ଏହି ଅବସରରେ ଆଦିବାସୀ ସଂସ୍କୃତି ଓ ବିକାଶ ଦିଗରେ ଅବଦାନ ପାଇଁ କିଛି ସାମାଜିକ କର୍ମୀଙ୍କୁ ବିଶ୍ବବିଦ୍ୟାଳୟ ଦ୍ବାରା ସମ୍ବର୍ଦ୍ଧିତ କରାଯାଇଥିଲା। ସେମିନାରର ସହ ଆବାହକ ଡ. ବିକେ ଶ୍ରୀନିବାସ ଧନ୍ୟବାଦ ଅର୍ପଣ କରିଥିବା ବେଳେ ଆସୋସିଏଟ୍ ପ୍ରଫେସର ଡ. ନିର୍ଝରିନି ତ୍ରିପାଠୀ କାର୍ଯ୍ୟକ୍ରମକୁ ସଂଯୋଜନା କରିଥିଲେ।

ଉଦ୍ ଘାଟନୀ ଅଧିବେଶନରେ ବିଶ୍ୱବିଦ୍ୟାଳୟର ବହୁ ବିଶିଷ୍ଟ ବ୍ୟକ୍ତି, ଅଧ୍ୟାପକ, କର୍ମଚାରୀ, ବନବାସୀ କଲ୍ୟାଣ ଆଶ୍ରମ ଓ ଅନ୍ୟାନ୍ୟ ଆଦିବାସୀ ସଂଗଠନର ସଦସ୍ୟ, ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଓ ଗବେଷକମାନେ ବହୁ ସଂଖ୍ୟାରେ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ପଦ୍ମଶ୍ରୀ ଗୋବର୍ଦ୍ଧନ ପାନିକା, ବନବାସୀ କଲ୍ୟାଣ ଆଶ୍ରମର ସଂଗଠନ ସମ୍ପାଦକ ଜୟଶଙ୍କର ପ୍ରସାଦ ଖଡ଼ଙ୍ଗା, ଜୈବବିଭିଦାତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଭାଗର ପ୍ରଫେସର ଶରତ କୁମାର ପାଲିତା, ଶିକ୍ଷା ବିଭାଗର ପ୍ରଫେସର ଭରତ କୁମାର ପଣ୍ଡା, ବିଶିଷ୍ଟ ପ୍ରଫେସର ଶିବ ରାମକୃଷ୍ଣ, ଏସ୍ଜେ ବିଶ୍ୱମିତ୍ର ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ କୁଳପତି ଓ ବିଶିଷ୍ଟ ବ୍ୟକ୍ତିମାନେ ବିସିଏନଆର ବିଭାଗର ଡ. ଦେବବ୍ରତ ପଣ୍ଡାଙ୍କ ସଂଯୋଜନାରେ ଆୟୋଜିତ ପାରମ୍ପରିକ ଖାଦ୍ୟ ଓ ବାଜରା ମହୋତ୍ସବକୁ ଉଦ୍ ଘାଟନ କରିଥିଲେ।