ୟୁକ୍ରେନର ଅନେକ ସହର ଉପରେ ଋଷିଆର କ୍ଷେପଣାସ୍ତ୍ର ଆକ୍ରମଣ; ତଦନ୍ତ ପାଇଁ ବିଶ୍ୱସ୍ତରୀୟ ନେତାଙ୍କ ଆହ୍ବାନ

ଶୁକ୍ରବାର ଦିନ, ରୁଷିଆର ସେନା ୟୁକ୍ରେନର ଅନେକ ସହର ଉପରେ ଭୟଙ୍କର ଆକ୍ରମଣ କରିଛି। ନ୍ୟୁଜ୍ ଏଜେନ୍ସି ରିପୋର୍ଟ ଅନୁଯାୟୀ, କ୍ଷେପଣାସ୍ତ୍ର ରାଜଧାନୀ କୀଭ୍ ଏବଂ ପଶ୍ଚିମ ସହର ଲଭିଭ୍ ଉପରେ ପଡିଛି। ଏହି ଧ୍ୱଂସାବଶେଷ ୟୁକ୍ରେନ ସହରର ସବୁ ସ୍ଥାନରେ ଦୃଶ୍ୟମାନ ହେଉଛି। ଏଥି ସହିତ, ୟୁକ୍ରେନର ସ୍କୁଲ ଏବଂ ଡାକ୍ତରଖାନା ସମେତ ଆବାସିକ ଅଞ୍ଚଳରେ ଋଷିଆର ଆକ୍ରମଣର ତଦନ୍ତ ପାଇଁ ବିଶ୍ୱ ନେତାମାନେ ଆହ୍ବାନ କରିଛନ୍ତି। ଲଭିଭ୍ ଉପରେ ଋଷିଆର ଆକ୍ରମଣ ଆଶ୍ଚର୍ଯ୍ୟଜନକ କାରଣ ବର୍ତ୍ତମାନ ସହରଟି ଏକ ପ୍ରମୁଖ ଆନ୍ଦୋଳନର କେନ୍ଦ୍ର ହୋଇ ରହିଛି।

ଲଭିଭର ମେୟର ଆଣ୍ଡ୍ରେ ସାଡୋଭି କହିଛନ୍ତି ଯେ ସାମରିକ ବିମାନ ମରାମତି କରୁଥିବା ଏକ କାରଖାନା କ୍ଷେପଣାସ୍ତ୍ର ଦ୍ୱାରା ଆକ୍ରମଣ କରାଯାଇଛି। କେବଳ ଏତିକି ନୁହେଁ ବସ୍ ମରାମତି କରୁଥିବା ଏକ କାରଖାନା ଉପରେ ମଧ୍ୟ ଆକ୍ରମଣ କରାଯାଇଥିଲା। ୟୁକ୍ରେନର ବାୟୁସେନାର ୱେଷ୍ଟର୍ଣ୍ଣ କମାଣ୍ଡ ଦାବି କରିଛି ଯେ କଳା ସାଗରରୁ ଲଭିଭ ଉପରେ ୬ ଟି କ୍ଷେପଣାସ୍ତ୍ର ନିକ୍ଷେପ କରାଯାଇଛି।

ଆବାସିକ ଅଞ୍ଚଳରେ ହୋଇଥିବା ଆକ୍ରମଣର ତଦନ୍ତ ପାଇଁ ବିଶ୍ୱସ୍ତରୀୟ ନେତାମାନେ ଆହ୍ବାନ କରିଛନ୍ତି। ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ୍ କହିଛନ୍ତି ଯେ ଆମେରିକାର ଅଧିକାରୀମାନେ ଯୁଦ୍ଧ ଅପରାଧର ମୂଲ୍ୟାଙ୍କନ କରୁଛନ୍ତି। ଯଦି ଋଷିଆ ଦ୍ବାରା ସାଧାରଣ ନାଗରିକଙ୍କୁ ଉଦ୍ଦେଶ୍ୟମୂଳକ ଟାର୍ଗେଟ କରିବାର ପ୍ରମାଣ ଅଛି, ତେବେ ଏହାର ପରିଣାମର ସାମ୍ନା କରିବାକୁ ପଡିବ। ଜାତିସଂଘର ଅଣ୍ଡର ସେକ୍ରେଟେରୀ ଜେନେରାଲ୍ ରୋଜେମାରି ଡିକାର୍ଲୋ ମଧ୍ୟ ଋଷିଆ ଆକ୍ରମଣରେ ସାଧାରଣ ନାଗରିକଙ୍କ ମୃତ୍ୟୁ ଘଟଣାର ତଦନ୍ତ କରିବାକୁ କହିଛନ୍ତି। ସେ ଏଥିପାଇଁ ମିଳିତ ଜାତିସଂଘ ସୁରକ୍ଷା ପରିଷଦର ଦୃଷ୍ଟି ଆକର୍ଷଣ କରିଛନ୍ତି।